Pablo Fernández entrevistoume no programa Café con gotas da emisora Cuac FM, o día 20 de febreiro de 2019. Falamos de contos (por suposto!) e de Buscando A Rosalía, o espectáculo que presentei o día 23 na Biblioteca Miguel González Garcés.
Hoxe tiven o pracer de coñecer a Casa Museo Manuel María en Outeiro de Rei, unha visita moi recomendable. Alí esperábanos Antón que moi amable fíxonos unha visita guiada por todos os cuartos da casa, contounos moitas anécdotas, descubriunos segredos, enredamos entre espellos e versos… Logo compartín contos e lendas na vella palleira coas familias, ao remate Antón nos convidou a merendar, sempre o fai cos artistas. Que riquiño!! como a tortilla, o xamón e o queixiño!!
Hoxe venres, na Biblio Nodal de Lugo, fixen novas amigas e amigos e reencontreime con moitas cullarapas e cullarapos que xa están feitos unhas ras!! Como medraron!!
Hoxe pola tarde na Biblioteca de Pontevedra tiven visita, agardaba por min alí, Vituco, do Diario Cultural para parolar un chisco sobre os contos antes de facer unhas “RAPOSADAS”. Aquí tedes a ligazón por se queredes por a orella. A partir do minuto 11. Moitas grazas a Vituco e ao programa polo interese. Ata o próximo conto!!
Veño feliz de ver como desfrutou a cativada no MiniFICVíaXIV. Un ano máis Aldara, a miña pequena gran actriz, protagonizou o video promocional de Cinema de Historias. Rodamos no Cine de Seixo, en Marin, un dos cines máis antigos de Galicia e que conserva un proxector de 35mm. Perfecto Carballo, o dono do cine, contounos moitas historias de cine e deixounos gravar tamén na cabina de proxección, cunha antigo proxector OSSA en marcha, grazas!!! (O camarógrafo do video, como lle gusta que lle chamen, foi Daniel Piñeiro e a montaxe de Jorge Godás e a súa equipa)
Desde o Vía XIV, Festival Internacional de Curtas de Verín, Galicia quero compartir a miña admiración pola gran Alice Guy contando a súa historia ás nenas e aos nenos , o futuro !!! Por que non se pode querer nin admirar a quen non se coñece…
Alice Guy, dende ben pequena, escoitou contos da súa avoa que fixeron agromar nela o amor polos libros. Co paso do tempo chegou a ser unha gran contadora de historias que logo levaría á gran pantalla.
Oxalá nos vexamos o ano que vén! Xa teño ideas…
O festival tivo moita repercusión nos medios, e tamén Cinema de Historias:
E por suposto na prensa escrita:
Grazas a todas e todos os que fixeron posible este Cinema de Historias:
Veño feliz de compartir os nosos tesouros coas familias e participantes das III Xornadas sobre Antropoloxía organizadas pola SAGA (Sociedade Antropolóxica Galega).
Grazas por escoitar O eco das pedras !!!
E lembrade… Na nosa terra, Galicia, as pedras están vivas. Nelas agóchanse tesouros, nelas viven as mouras encantadas, as serpes grandes, os mouros, os trasnos, os xigantes. Dentro das covas dormen as nubes do Nubeiro antes de formar fortes treboadas. Sobre as pedras descubrimos misteriosos petróglifos, gravados feitos sobre a pedra ao aire libre, que semellan mensaxes secretas que temos aínda que descrifrar. As pedras falan, só hai que pararse a escoitalas para poder viaxar ao outro lado, alén.
Con este espectáculo de narración oral pretendo:
-Que as nenas e os nenos coñezan o valor do noso patrimonio cultural material e inmaterial.
-Que redescubran os nosos petróglifos para que aprendan a estimalos e a coidalos.
-E que coñezan os contos e lendas que nos fan pobo para que logo lles pregunten aos seus avós e bisavós por eles, para que as historias revivan de cada vez e nunca se esquezan.
Fotos de Daniel Piñeiro no Centro Cultural de Cerponzós. Grazas Juan Jose Esperón pola boa acollida.
O Diario de Pontevedra reseñou a actuación na sua edición do día 19/11/2018
