Historias azuis

Historias azuis

HISTORIAS AZUIS

Integra a diabetes na escola

Dous espectáculos de contos creados por Raquel Queizás en colaboración coa Asociación de nenas, nenos e xente nova con diabetes de Galicia (Anedia), co obxectivo de integrar a diabetes nas escolas.

Todos os nenos e as nenas dende unha idade temperá pasan moito tempo na escola, o centro de educación máis importante despois do fogar. Canto mellor sexa a colaboración entre os pais e nais e o profesorado, mellor será a evolución na infancia de quen padece diabetes tipo 1.

Canto máis se fale desta doenza de forma positiva máis normal lles parecerá a diabetes de tipo 1 ás crianzas diabéticas e axudará a eliminar prexuízos. Medrar cunha doenza crónica como a diabetes de tipo 1 non debe ser un freo para o seu desenvolvemento. Tamén durante a infancia, quen ten diabetes pínchase para facer os controis de glicemia, inxéctase insulina e leva unha alimentación sa pero ante todo é un neno ou unha nena coma os demais.

Este neno ou nena convive na clase cun grupo que, na maioría dos casos non saben nada da diabetes de tipo 1 e para quen as picadas, as plumas ou as bombas de insulina e os medidores son obxectos estraños. Sen esquecer as emocións causadas pola súa diabetes ás que se deben enfrontar. Ou os síntomas dunha hipoglicemia ou unha hiperglicemia que non só afecta á nena ou neno diabético senón tamén ao resto do alumnado da aula e educadores.

OBXECTIVOS QUE SE VAN ALCANZAR:

-Explicarlles aos nenos e ás nenas de forma sinxela en que consiste a diabetes.


-Familiarizar o alumnado cos síntomas máis comúns que pode presentar unha persoa diabética na súa vida diaria.

-Proporcionarlles unhas pautas de actuación para que poidan apoiar e acompañar as persoas diabéticas do seu contorno.

A QUEN VAI DIRIXIDO

Á nena e ao neno diabético para que acepte máis facilmente a súa doenza diante dos compañeiros.

Aos compañeiros de clase para que coñezan mellor a diabetes de maneira que a integración na aula sexa óptima. Sen esquecer o feito de compartir a información sobre a enfermidade. Quen sexan máis maiores poden tamén recoñecer os síntomas de hiper/hipo e comunicarllo ao profesorado.

Ao profesorado para que se sinta máis apoiado na acollida en clase dun neno ou nena con diabetes de tipo 1.

PROPOSTA

Este proxecto permite dar a coñecer a diabetes dunha forma lúdica e educativa. Pretende facer fincapé nas emocións e nos estados de ánimo que suscitan tratar esta realidade. A educación emocional é moi importante.

Queremos unha infancia feliz, nenos e nenas que sexan boas persoas, que se sintan ben consigo e coa xente que os rodea. Queremos unha infancia que saiba expresar non só contidos senón tamén emocións.

A información será presentada de forma lúdica a través de dous espectáculos de contos adaptados á idade das nenas e nenos.

Non nos deixamos vencer pola diabetes, enfrontámonos a ela xuntos”.

NANO TEN DIABETES

(dirixido a nenas e nenos de 3 a 6 anos)

Había unha vez unha ra que non paraba de brincar, sempre cantaba contenta baixo o sol ata que un día todo cambiou… Nano xa non dá choutos, non canta, está triste e bebe auga sen parar. Que lle pasará? NANO ten diabetes.

A través do monicreque da ra, dunha forma entretida e sinxela, os nenos e as nenas comprenderán como se encontra o e porqué está así. O personaxe da ra Nano, servirá como fío condutor para explicar os síntomas máis comúns da diabetes. A través da historia de Nano establecerase un diálogo co público para que poidan comentar o que comprenderon.

Para as mentes que aínda non teñen todas as palabras para expresarse empregaremos monicreques, debuxos, xogos en grupo.

UN CASO AZUL

(dirixido a nenas e nenos de 7 a 11 anos)

A detective Queizás enfróntase ao caso máis difícil da súa carreira.

Tras días buscando a M.S. unha montañeira perdida consegue dar con ela no máis profundo dun bosque. Está tirada no chan sen folgos atrapada nunha silveira, pero compórtase dun xeito estraño. Comería algo velenoso? Picaríalle unha víbora?

Unha detective vai ser quen se atope con que a diabetes forma parte dun caso no que está a investigar. De forma similar ao proceso que un profesional da medicina leva a cabo para realizar un diagnóstico, a rapazada irá seguindo indicios e descubrindo información sobre esta doenza dunha forma lúdica e interactiva.

CONCLUSIÓNS

HISTORIAS AZUIS ofrece ferramentas para fomentar o diálogo na aula. O profesorado e os compañeiros de clase, que están ben informados e non temen intervir nin solicitar axuda, convértense nun grande apoio para o alumno ou alumna con diabetes.

Fai preguntas! Cóntanos ! Estamos para acompañarte!

Nanocontos

Nanocontos

Nanocontos

Para os nosos amigos, os animais, cada día é unha nova aventura chea de cousas que aprender, mentres xogan coas cores, as formas e a música. Porque cando se é tan pequeno ata as cousas más sinxelas se converten en todo un reto.
Os meniños reinventan o mundo cunha mirada que o ve todo pola primeira vez, abraiándose a cada paso, mentres aprenden novos nomes para os obxectos que acaban de descubrir.
Un espectáculo que estimula as habilidades de percepción espacial e psicomotricidade dos bebés a través de pequenas historias adaptadas para captar o seu interese e cunha duración apropiada á súa capacidade de atención.

Este é NANO, unha ra que medra cos contos que eu mesma invento.

Nano está aprendendo pouco a pouco o nome das cousas, as cores…, todo    o fai xogando, ata que lle toca compartir a auga da súa cunca amarela co pequeno paxaro vermello, Pío.

Non! di Nano -A auga é miña…

Nano érguese cedo como cada mañá, pero…achís! Hoxe non se atopa moi ben.
O seu amigo Pío dille que vaia ver o doutor. Nano non sabe onde está a súa consulta, pero polo camiño coñecerá a Dara, unha boa amiga, que o vai axudar…

Nano recibe unha visita moi especial o día do seu aniversario. Está todo preparado: a torta, as candeas, os globos. Só faltan os amigos, a que xogarán? Ao rematar terá que se bañar e descubrirá o divertido que é coñecer as partes do seu corpo ao ritmo da música.

Nano está moi feliz, naceu o súa irmá máis pequena, Nona, e vai coidar dela. Pero ao chegar a noite Nona
non quere ir á cama. Nano ten unha misión, conseguir durmir a Nona sexa como sexa.

Era primavera, camiñaba eu por unha fermosa fraga cando, de súpeto, caín nunha poza!. Tremenda choupada!. Dentro da auga atopei un ovo grande; dende o seu interior, uns ollos saltóns mirábanme…

Nano canta  croac  cando está contento, pero hoxe está moi calado. Que lle pasa a Nano?
Ás veces non é fácil saber como nos sentimos. Estamos tristes ou anoxados?
Ímolo averiguar.

Un conto musical para axudar os mais pequechos a expresar como se senten.

Nano está medrando moi á présa, xa sabe facer moitas cousas el soíño, pero non quere deixar de usar o cueiro. Ás veces, xogando, todo parece máis sinxelo e divertido. Para usar o penico Nano montará un circo…

 

Nano é o maior é dá grandes chimpos de ra, Nona, a súa irmá pequena, cae, non sabe, e rise dela.

Nano ten celos de Nona, “Agora, -pensa-, todos os agarimos son para Nona, Nona para aquí, Nona para alá”. Nano quere volver ser pequeno outra vez…

 

Chegou o outono, Nano dá choutos sobre as follas de cores  mentres canta:

Outono bonito
folliñas no chan
castañas asadas
que ricas están!

Estades todas e todos convidados o magosto  con Nano.

Nano é unha ra pequena, unha ra que vive cada día unha nova aventura, porque cando se é tan pequeno ata as cousas más sinxelas se converten en todo un reto. Nano vai ter unha nova experiencia vital… vai ir por primeira vez á escola! Como se enfrontará a esta etapa que comeza desde a súa condición de galegofalante? Nano comeza a etapa escolar e é así como vai descubrindo que desde ese lugar tan diverso, a seguridade de ter personalidade e lingua propia van ser un gran apoio.

 

Toin Toin

Toin Toin

É hora de durmir, hai unha fermosa lúa arriba no ceo. Todo está en silencio chsssss!
PRRRRRRR!!!! Popopoooopoooo!!! TOIN TOIN!!! A pequena coella non para de brincar, non quere durmir sen o seu conto. Papá coello comeza a ler e, de súpeto, antes de rematar a historia, queda durmido Zzzzzz!
A hora de durmir sempre se presenta como unha aventura…

TOIN TOIN é un espectáculo de contos con monicreques de mesa, acompañado de instrumentos musicais sinxelos, para gozo dos máis pequenos da casa e dos seus pais.

X