Relatos de misterio.
Historias de terror.
Lendas urbanas.
Caso Pechado é un espectáculo de narración oral para adolescentes, que recolle lendas urbanas, relatos de misterio e historias de terror.
Unha detective fala dos casos máis curiosos que tivo que investigar. Case todos foron resoltos, son casos pechados, agás algúns…
A deusa Atenea está na terra, vén de incógnito, ocultando os seus ollos relucentes baixo unhas lentes de sol.
Atenea chega na procura do seu pai, Zeus, para investigar en que se metamorfoseou esta vez. Tras ser descuberta, lembraranos como foi o seu estraño nacemento e como se vive no Olimpo.
Navegando nas verbas da deusa rememoraremos, quer como testemuñas, quer como protagonistas, diferentes mitos gregos:
A MAZÁ DE OURO
ECO E NARCISO
TESEO E ARIADNA
Atenea vén para demostrarlles aos mortais que o amor non trae máis que sufrimento e desgrazas, mais… quen pode resistir os seus doces e tentadores lazos?
Onde se conta o que sucedeu o día no que Dulcinea do Toboso escapou do libro Don Quixote da Mancha. Aventuras e desventuras dunha muller, metade pailana, metade dama.
Cansa de que todos falen e opinen sobre ela, Dulcinea decide contarnos a súa versión dos feitos:
Como se coñeceron de pequenos ela e don Quixote; o seu grande amor polos libros; a máis fantástica aventura imaxinada dos muíños de vento; como foi o seu encantamento e moito máis…
Pasei a miña nenez escoitando as lendas que contan as pedras de tempos máxicos e remotos. Palabras na boca da miña nai, palabras na boca da miña avoa, palabras que me alimentaron e fixéronme crecer. Deambulando entre historias vividas e lidas, namoreime. Palabras na boca traio para compartir e urdir relatos coa miña voz… e coas miñas mans.