Onte pola tarde fun convidada a contar na “Xornada Igualdade e Retos”, nova xornada de formación para profesorado na EGAP, organizada polo CAFI (Centro Autonómico de Formación e Innovación). Grazas por contar comigo, Elena, Marián e Manuel. Grazas a todo o profesorado tamén pola vosa entrega e complicidade.
Este luns impartín un obradoiro de iniciación na arte de contar contos aos alumnos de 2ºA e 2ºB de ESO do CPI “Curros Enríquez” de Pazos de Borbén.
O obxectivo deste obradoiro de iniciación foi o de intentar achegar ao alumnado o amor pola nosa lingua a través dos nosos contos e as nosas lendas para lles descubrir os nosos seres míticos, que en ocasións gardan moitas similitudes cos seres míticos doutras culturas.
O tempo foi pouquiño pero puxéronlle tantas ganas, teñen tanto que contar… que haberá que voltar!!!
O xornal Faro de Vigo reseñou este obradoiro na sua edición do 11/12/2018
No obradoiro de contos con obxectos que impartín en Barro gocei unha chea, pasaron as horas voando. Estas mulleres teñen tanto que contar. A radio antiga , o vello costureiro, a toca de mamá… gardan a súa memoria.
Son fantásticas!!! Claro que sí, están a xogar moito, lembrando moito, imaxinando moito!!! O sábado, 9 de xuño, coñecimos un pouquiño máis a estas mulleres “Cheas de Historias”. Grazas a Pilar por todo, a Roberto pola confianza e ao señor alcalde de Barro por programar estas iniciativas culturais! “DÁNDOLLE Á LINGUA”.
Podedes ver as presentacións destas magníficas alumnas no seguinte video:
O Diario de Pontevedra reseñou a presentación na sua edición do 13/06/2018:
Foi un auténtico pracer ir o CPI Dr. López Suárez de Friol (Lugo) para impartir un obradoiro de iniciación na arte de contar contos.
Así o contaron no blog da biblioteca do CPI Dr. López Suárez:
O venres, día 7 de abril, tivemos unha visita de luxo. A actriz, contacontos e titiriteira Raquel Queizás viaxou ata as nosas terras para ofrecer ao alumnado da Eso un obradoiro de iniciación na arte de contar contos. Despois de crear un clima distendido e propicio para a desinhibición, mostrounos unha chea de técnicas e recursos para dar vida aos personaxes das historias, ensaiando distintas tipoloxías mediante a expresión oral e corporal. Ao final desta sesión o alumnado converteuse no verdadeiro protagonista, deixándonos ver nalgún caso que, con traballo, poderán chegar a ser grandes contacontos.
Na segunda sesión o alumnado da Eso deixou o escenario para se converter en público e observar todo o aprendido na hipnótica actuación de Raquel diante do alumnado de Infantil. Ofreceu contos tirados das lendas, centrándose nos seres mitolóxicos da tradición galega, concretamente, trasnos e meigas.
E agora, o reto: o alumnado da Eso terá que se preparar para facer unhas contadas aos cursos de infantil nunha sesión no mes de xuño, día aínda por determinar. Ánimo a tod@s!
Agradecementos a Raquel por esta xornada, e recordemos o seu consello para lograr namorar cos contos: moita preparación e sentir o pracer pola transmisión oral
Este ano no CIOV (Centro de Interpretación da Oralidade de Vigo) impartín un obradoiro sobre a narración de contos con obxectos.
Comezamos xogando co máis sinxelo, con pauciños, paus do monte, buscando a súa identidade. Co paso dos días descubrimos que era o pau quen nos movía a nós e non ao revés. Xurdiron historias cómicas, poéticas, dramáticas. Na segunda parte deste obradoiro manipulamos obxectos da vida cotiá na procura da súa metáfora para contar o conto. As alumnas e alumnos xa son un gran equipo que se xunta para contar os Contos da Pota, ou os Contos da Granxeira. Fai falla moita imaxinación e moitas ganas de xogar co noso imaxinario e contos, fan falla moitos contos…Aquí os podedes ver.
Grazas ao departamento de Normalización Lingüística do Concello de Vigo e a Ana Carreira, a directora da escola por confiar no meu traballo.
Descubrir a narradora, o narrador que levamos dentro, mergullarse nas lembranzas, xogar cos obxectos con memoria… Contar, contar, contar… e por suposto, compartir:
Por segundo ano consecutivo, a Comisión de Normalización Lingüística da Facultade de Ciencias da Educación da Universidade de A Coruña, convidoume a impartir un obradoiro de narración oral dirixido aos alumnos de 2º Grao en Educación Infantil da materia Didáctica da Lingua Galega. O obxectivo do obradorio foi compartir a miña experiencia cos futuros mestres para contar un conto de tradición oral a unha aula de educación infantil.
Grazas a Comisión de Normalización Lingüística! Grazas mestras e mestres do futuro!
